مكونات عجينه الكريب
نصف كيلو لبن
ربع كيلو دقيق
معلقه كبيره ملح
ربع فنجان صغير زيت زره
4 بيضات
1 معلقه صغيره زعتر بودره وهتقوليلى ليه الزعتر البودره هقولك عشان زفاره البيض متبقاش لها اى اثر فى العجينه
الطريقه
هنضرب البيض مع اللبن مع الزعتر البودره بالمضرب السلك كويس اوى وبعدين هنضيف الملح مع التقليب وبعدين نضيف الدقيق مع التقليب وفى الاخر هنضيف الزيت لحد ماتحصلى على عجينه سائله متماسكه وبعدين نصفى العجينه دى بمصفاه رفيعه وبعد كده هنجهز طاسه تيفال وندهنها زيت بسيط اوى ونحط مقدار من العجينه دى فى الطاسه على النار ونقلبها على الوش التانى وهكذا لحد ما الكميه كلها تخلص معاكى
كده عملنا الكريب الحادق
كل اللى هتعمليه بقى تجهيز الحشوه اللى بتحبيها انتى واسرتك زى البسطرمه او الانشون سلامى او الريكفورد او الشاورمه او التونه او الفراخ الكرسبى اى حشوات بتحبيها وطبعا هنحتاج جبنه مودذاريلا هتحشى الكريب وتحطى شويه جبنه على الحشو وتلفى الكريب زى السندوتش بظبط ولو عندك توستر هتحطى الكريب ياخد لون وكمان عشان الحشو يتجانس مع بعضه ولو مش عندك يبقى ممكن على الجريله الكهربا لمده دقيقه ياخد لون او طاسه بدون زيت على النار وبالهنا والشفا
ليست هناك تعليقات:
إرسال تعليق